我拜别半醉的朋友，在鹅颈桥後登上红van，车还是半满，司机悠闲地开着收音机，大气中送上懒洋洋的乐曲。
我也喝了不少廉价的ICE，不过充满油脂的晚餐好像阻隔了大部分酒Jing吸收，坐在车上看着车头的跳字钟，头脑还是清晰的。
「你今晚系唔系宿？」你发来ig direct。
「出左去食饭，不过返紧黎」
「from where?」
「cwb ah」
「红van?」
「系，不过仲未开车」
「黎唔黎我度瞓？」
「都??可以嘅」
「咁我系四条柱等你」
「唔洗啦我识黎」
「夜晚有人接你好啲嘅」
「中大夜晚好危险咩？」
「有色魔，专搞啲夜麻麻系四条柱落车嘅小朋友」
「应该就系你？」
「系呀今晚出去搞细路」
「可以呀，我报定警先」
「你就快到就同我讲啦，我要啲时间行出黎」
「好啦我瞓下先」
红van早就在谈话途中开出，往夜幕低垂的关系驶去。
司机大哥在正门不远处靠左减速，车还未停定，门已顺势地打开，我也不敢怠慢，利用冲力飞到车门旁边，左脚踩落地的那一刻，红van刚刚好达至静止状态，我的右脚还在空中期间，身後的车门已经关上，小巴瞬间绝尘而去。
我看看自己的手脚还在，心中不禁感恩。
你早在站在对面马路等待着我，踢着拖鞋，身穿颓tee，右手夹着一枝正在点燃的烟。
「喂」我难掩心中点点兴奋的心情。
「今晚食左咩呀？」
「同啲中同打边炉炸嘛，系桥底果间」
「好似都几劣食」
「嘻，间间都系咁上下架啦，有边个系为左啲食物去呀」
「都系嘅，为左见下啲人，今晚多唔多人去？」
「都有十几廿个嘅，算几好啦坐左两枱」
「你中学系男校？」
「系呀，你又知嘅？」
「估到，男校仔有样睇架」
「食过好多呀？」
「我ex系姐」
我们穿过保安更亭旁的闸口，往山上方向走去。白光灯下的保安正在半睡半醒地打量着我们，手中还拿着正在播放粤曲的电话，多半心里也在怪责为何年轻人不喜欢睡觉。
「咁你系咪？」
「系咪咩？」你问。
「系咪都系读男校？」
「你觉得呢？」
「下点估呀」
「比你再慢慢估，不过男校好似好多你呢种人」
「我呢种即系？」
「好似好多呢啲。。。对自己性取向有啲模糊嘅人？」
「唔。。。讲真其实我冇好认真咁谂过」
「你果阵系比人追架？」
「都唔知算唔算比人追，总之一切嘅野都好似发生得好快咁」
我还记得那天晚上，在西九公园内的搭讪，那种奇怪得来又有点幼稚的对话，心跳有点加速的感觉，回想起来还有种脸红耳赤的尴尬。
你没有追问下去，在漆黑的林荫大道中和我并肩而行，走在早已停下的扶手电梯上，你停下来，看着只剩下半点火的教学楼，我对上了你的视线，再看着你正凝视的不远处。你或许看穿了我眼中的不惑，解释道：
「我好中意夜晚系度周围行，我觉得好静，有好大个私人空间咁」
「夜晚啲野都好似靓啲咁，啲野冇睇得咁清」
「行啦」
你抛下一句，我们继续上山。
＊＊＊
我熟练地轻声关上门再锁上，你室友的书桌好像还是原封不动。
「我冇返去拎野呀，你有冇衫借比我今晚着？」
「乜要着衫架咩？」你顽皮地回应。
「你系咪想我冲完凉咩都唔着咁行返黎先？」我也不认输。
「你想嘅可以呀」
「我唔惊架，以前着泳裤都系咁比人睇，同包毛巾差唔多姐」
「一阵啲女女见到咪蚀比佢地？」
「点会呢？话唔定今晚可以去第二层过夜呢，嘿」
你从衣柜里翻出一套睡衣，抛了过来。
「嗱，你有衫啦，唔好ff」
「下次洗返乾净比返你罗」
「唔洗啦，以後呢套衫就留比你过黎着」
「咦，都唔知有几多个人着过」我装出压恶的表情。
「好污糟架，之前啲人乜都有，街边个露宿者都着过」
「你今晚瞓街呀嘛ok冇问题」
「冲凉先，唔理你」
「喂等埋」你拾起地上的小篮子，跟着我离开房间。